На Бахмуцкім напрамку УСУ перайшлі з абароны ў наступ. Расійскія войскі, каб утрымаць пазіцыі, вымушаныя сцягваць рэзервы. Пра гэта паведаміла намесніца міністра Украіны Ганна Маляр.
— За мінулыя суткі маем прасоўванне на розных участках Бахмуцкага напрамку ад 200 да 1100 метраў. Вораг на гэтым напрамку перайшоў да абароны, спрабуючы ўтрымаць займаныя пазіцыі, — напісала Маляр.
Намесніца міністра абароны адзначыла, што расіяне для ўтрымання пазіцый сцягваюць рэзервы. Пасля амаль поўнага выхаду вагнераўцаў баявыя дзеянні вядзе рэгулярная армія, задзейнічаныя дэсантна-штурмавыя атрады.
— Так доўга трымаць абарону Бахмуцкага напрамку і цяпер на ім наступаць удаецца ў тым ліку дзякуючы загадзя падрыхтаваным умацаванням. Уся мясцовасць вакол — гэта фактычна умацаваны раён. Рыхтавалася ўмацаванне загадзя сіламі нашых войскаў і мясцовых ваенных адміністрацый. Будавалі капітальна, — адзначыла Ганна Маляр.
Нагадаем, 5 чэрвеня намесніца міністра паведаміла, што Украіна ў межах абарончай аперацыі на некаторых напрамках пераходзіць да наступальных дзеянняў.
Яна таксама апублікавала карту, на якой Бахмут абведзены чырвоным, магчыма, намякаючы на тое, што УСУ хочуць узяць горад у акружэнне.