У ноч з 15 на 16 траўня Кіеў падвергнуўся восьмай з пачатку месяца і самай масіраванай ракетнай атацы. За кароткі прамежак часу па сталіцы Украіны выпусцілі максімальную колькасць ракет, у тым ліку балістычных. Пра гэта паведамілі ў Кіеўскай гарадской вайсковай адміністрацыі.
Атака пачалася ў 3.30, Украіна была атакаваная з паўночнага, паўднёвага і ўсходняга напрамкаў 18 ракетамі розных тыпаў паветранага, марскога і наземнага базавання, паведаміў падрабязнасці галоўнакамандуючы УСУ Валерый Залужны.
— З шасці самалётаў МіГ-31К выпусцілі шэсць аэрабалістычных ракет Х-47М2 «Кінжал», 9 крылатых ракет «Калібр» — з караблёў у Чорным моры і тры ракеты наземнага базавання (С-400, «Іскандэр-М»). Усе 18 ракет знішчаныя сіламі і сродкамі супрацьпаветранай абароны Паветраных сіл УС Украіны, — расказаў Залужны.
Паводле яго словаў, акрамя ракет РФ задзейнічала ўдарныя дроны тыпу Shahed-136/131, а таксама праводзіла паветраную разведку трыма беспілотнікамі аператыўна-тактычнага ўзроўню — «Арлан-10», Supercam.
Абломкі збітых ракет упалі як мінімум у пяці раёнах Кіева. Найбольшыя пашкоджанні зафіксаваныя ў Саломенскім раёне — там было ўзгаранне нежылога памяшкання і некалькіх аўто. Тры чалавекі пацярпелі.
У астатніх раёнах абломкі ўпалі на прыпаркаваныя аўтамабілі, прыдомавую тэрыторыю або лесапаркавую зону. Абломкі таксама ўпалі на тэрыторыю кіеўскага заапарка. На шчасце, ніхто з работнікаў заапарка і жывёл не пацярпеў, адзначыў мэр Кіева.
— Цяпер з жывёламі праводзяць антыстрэсавыя мерапрыемствы. І сёння, як звычайна, у 10.00 заапарк адкрыецца для наведнікаў, — напісаў Клічко ў сваім тэлеграм-канале і заклікаў гараджан прыйсці і падтрымаць насельнікаў «КіеўЗаа».
Віталь Клічко апублікаваў відэа з кіеўскага заапарка.
Усе шэсць «Кінжалаў», якія збіла СПА, ляцелі на Кіеў, паведаміў спікер Паветраных сіл Украіны Юрый Ігнат у эфіры тэлемарафону.
— Кіеў застаецца ў эпіцэнтры, сталіца заўсёды была ў прыярытэце расіян, таму яе абараняюць сур’ёзнымі сродкамі, — заявіў вайсковец.