Губернатар Бранскай вобласці Расіі заявіў, што на тэрыторыю рэгіёна праніклі ўкраінскія дыверсанты і абстралялі цывільны аўтамабіль. Як сцвярджае Аляксандр Багамаз, у выніку адзін чалавек загінуў, раненні атрымала 10-гадовае дзіця. Між тым РІА «Новости» са спасылкай на экстранныя службы рэгіёна піша, што некалькі чалавек, паводле папярэдніх звестак, узятыя ў закладнікі.
— Сёння з Украіны на тэрыторыю Клімаўскага раёна ў вёску Любячане пранікла ДРГ. Дыверсанты здзейснілі абстрэл аўтамабіля, які рухаўся. У выніку абстрэлу адзін жыхар загінуў, параненае дзесяцігадовае дзіця. У цяперашні час дзіця дастаўленае ў бальніцу, яму аказваецца ўся неабходная дапамога. Узброенымі сіламі Расійскай Федэрацыі вядуцца ўсе неабходныя мерапрыемствы па ліквідацыі дыверсійнай групы, — напісаў губернатар Багамаз у сваім тэлеграм-канале.
Некалькі чалавек у краме ў вёсцы Любячане, паводле папярэдніх звестак, узятыя ў закладнікі, паведамляе РІА «Новости» са спасылкай на экстранныя службы.
Baza піша, што закладнікаў узялі ў вёсцы Сушаны, куды зайшло каля 50 дыверсантаў.
«Паводле папярэдніх звестак, група з 50 узброеных чалавек з жоўтымі павязкамі зайшла на тэрыторыю пасёлка ў Бранскай вобласці і ўзяла ў закладнікі частку жыхароў. Астатнія змаглі ўцячы, іншыя замкнуліся ў сваіх дамах», — сцвярджае Baza.
Тэлеграм-канал таксама паведамляе, што ў вёсцы ідзе бой, чуваць выбухі. У Сушанах падарваныя электрападстанцыя і газавая станцыя.
ТАСС са спасылкай на сілавыя ведамствы піша, што «ў закладніках могуць знаходзіцца да шасці чалавек», «ідзе боесутыкненне з украінскімі дыверсантамі».
«Групы ўкраінскіх дыверсантаў праніклі ў дзве вёскі, у адной з іх узяўшы ў закладнікі мясцовых жыхароў. Байцы Расгвардыі ўступілі ў боесутыкненне з баевікамі», — сказаў суразмоўца агенцтва. Сярод мірных жыхароў ёсць загінулыя і параненыя.
Прэс-сакратар губернатара Бранскай вобласці заявіла «Звезде», што сілавыя структуры працуюць па ўсёй тэрыторыі Сушан. Пры гэтым адзначыла, што пра колькасць ДРГ і пра закладнікаў інфармацыі няма.
«У памежным Клімаўскім раёне Бранскай вобласці ФСБ Расіі і прыдадзенымі сіламі Міністэрства абароны Расійскай Федэрацыі праводзяцца мерапрыемствы па знішчэнні ўзброеных украінскіх нацыяналістаў, якія парушылі дзяржаўную мяжу», — распаўсюдзіла РІА «Новости» афіцыйную заяву ФСБ.
Між тым украінскаму выданню «Бабель» у аператыўным камандаванні «Поўнач» сухапутных войскаў УСУ заявілі, што нічога не ведаюць пра інцыдэнты ў памежных з Расіяй раёнах. Там адмовіліся адказваць на пытанне, правакацыя гэта ці не.
Губернатар Бранскай вобласці Аляксандр Багамаз таксама паведаміў, што УСУ сёння атакавалі два населеныя пункты. У Клімаўскім раёне «ў выніку скіду з БПЛА» загарэўся жылы дом у вёсцы Сушаны. Мінамётнаму абстрэлу падверглася вёска Ламакаўка Старадубскай муніцыпальнай акругі. У выніку абстрэлу пацярпелых няма, пашкоджаныя два домаўладанні.