Пытанне з адстаўкай міністра абароны Украіны Аляксея Рэзнікава на гэтым тыдні разглядацца не будзе. Пра гэта паведаміла намесніца старшыні Камітэта Вярхоўнай рады па пытаннях нацыянальнай бяспекі, абароны і разведкі Мар’яна Безуглая.
Дэпутатка ў сябе ў Facebook напісала, што разгляд пытання «адносна Мінабароны і Мінстратэгпрам пакуль прыпынілі, на гэтым тыдні адставак і прызначэнняў не будзе».
Безуглая патлумачыла, што рашэнне прынятае з улікам рызыкі магчымага наступлення і «для сістэмы ў цэлым перад Рамштайнам (кантактная група па пытаннях дапамогі Кіеву. — Заўв. рэд.)».
Нагадаем, за дзень да гэтага галава кіраўнічай партыі «Слуга народа» ва ўкраінскай Вярхоўнай радзе Давід Арахамія ў сваім тэлеграм-канале паведаміў пра кадравыя прызначэнні і перастаноўкі ў сілавым блоку краіны. Паводле яго, пасаду міністра абароны пакіне Аляксей Рэзнікаў, на яго месца, як сцвярджаў Арахамія, будзе прызначаны кіраўнік ГУР Украіны, генерал-маёр Кірыл Буданаў. Рэзнікава, як сцвярджаў той жа Арахамія, могуць прызначыць на пасаду кіраўніка Міністэрства па стратэгічных галінах прамысловасці.
Сам Рэзнікаў назваў гэтую інфармацыю памылкай, заявіўшы, што з ім гэтае пытанне не абмяркоўвалася.
— Калі раптам мне такая прапанова паступіла б ад прэзідэнта Украіны ці прэм’ер-міністра, то я адмовіўся б ад яе, бо ў мяне няма экспертызы, якая дазваляла б мне якасна быць міністрам Міністэрства па пытаннях стратэгічных галін прамысловасці. Таму я думаю, што гэта памылка, — заявіў міністр абароны.
Варта адзначыць, што, згодна з Законам аб нацыянальнай бяспецы Украіны, на пасады міністра абароны Украіны і яго намеснікаў дазволена прызначаць толькі цывільных асобаў.