Былы кіраўнік «Раскосмаса», а цяпер кіраўнік ваенных дарадцаў РФ у акупаваных абласцях Украіны Дзмітрый Рагозін у сераду ўвечары, 21 снежня, быў паранены падчас абстрэлу Данецка — ён адзначаў дзень нараджэння ў мясцовым рэстаране. Раненні атрымаў і старшыня ўрада самаабвешчанай ДНР Віталь Хацэнка, два чалавекі загінулі, пішуць СМІ.
Памочнік Дзмітрыя Рагозіна паведаміў ТАСС, што напярэдадні ўвечары быў абстраляны гатэль на ўскраіне Данецка, дзе ў апошнія месяцы жылі сам экс-кіраўнік «Раскосмаса» і іншыя ваенныя дарадцы.
Рагозін атрымаў раненне ў спіну, але пагрозы жыццю няма — ён шпіталізаваны. Параненыя таксама людзі, якія яго суправаджалі.
Baza спаведамляе, што былы кіраўнік «Раскосмаса» атрымаў аскепкавае раненне мяккіх тканак галавы, пранікальнае аскепкавае раненне ягадзіц, а таксама пранікальнае аскепкавае раненне левага сцягна.
Паводле звестак выдання, усяго падчас абстрэлу загінулі два чалавекі, яшчэ пяцёра параненыя.
Праект SOTA ўдакладняе, што Рагозін знаходзіўся ў рэстаране пры гатэлі «Шэш-беш», дзе адзначаў дзень нараджэння. Таксама быў паранены кіраўнік урада самаабвешчанай ДНР Віталь Хацэнка, яго ахоўнік і яшчэ адзін чалавек забітыя.
Сам Рагозін выказаў здагадку, што абстралялі гатэль невыпадкова — хтосьці нібыта зліў інфармацыю пра яго месцазнаходжанне, перадае РБК.
— Гэта была рабочая сустрэча, вузкім колам і ў спакойнай абстаноўцы пасля вяртання з аднаго з нашых добраахвотніцкіх падраздзяленняў. У гэтым гатэлі мы жылі ўсе апошнія месяцы, і за 8 гадоў праціўнік ні разу не абстрэльваў гэтае месца. Хтосьці зліў інфармацыю, і каля 19.45 адбылося некалькі высокадакладных траплянняў, у тым ліку ў месца, дзе мы непасрэдна знаходзіліся, — заявіў ён, папярэдзіўшы, што «следства вызначыць, адкуль і хто».
Рагозін паведаміў, што яго параніла металічным асколкам 3×4 мм, патрэбная будзе аперацыя.
Яго памочнік удакладніў у каментары ТАСС, што дактары адмовіліся даставаць асколак міны, які трапіў у пазваночнік, і адправілі экс-кіраўніка «Раскосмаса» на перавязку.
Нагадаем, прэзідэнт РФ Уладзімір Пуцін звольніў Рагозіна з пасады кіраўніка «Раскосмаса» 15 ліпеня. Да гэтага ён амаль сем гадоў быў старшынёй калегіі Ваенна-прамысловай камісіі Расійскай Федэрацыі.
«Медуза» тады пісала, што Рагозін можа перайсці на працу ў адміністрацыю прэзідэнта. Расійскае выданне «Ведомости» у канцы верасня паведаміла, што Дзмітрый Рагозін можа ўзначаліць новую федэральную акругу — Крымскую. У яе склад увойдуць і сам паўвостраў, і далучаныя ў выніку «рэферэндумаў» тэрыторыі.
У лістападзе 2022 года стала вядома, што Рагозін узначаліў на вайне ва Украіне групу ваенных дарадцаў, якая аказвае ваенна-тэхнічную падтрымку вайскоўцам самаабвешчаных ДНР і ЛНР.