Афіцыйны сайт КДБ Беларусі не працуе ўжо больш за год. Калі раней падчас спробы зайсці на яго з’яўлялася паведамленне, што рэсурс знаходзіцца ў распрацоўцы, то цяпер старонка проста недаступная. «Люстэрка» спытала ў «Кіберпартызан», у чым можа быць рэч.
Як удакладнілі ў ініцыятыве, пасля атакі яны не рабілі нічога, каб так доўга блакаваць рэсурс ведамства. З іх словаў, прычына ў іншым.
— Пасля таго як у КДБ зразумелі, што сайт узламаны, яны самі яго адключылі, — расказалі «Кіберпартызаны». — Мы думаем, спецслужба баіцца чарговага ўзлому і таму не аднавіла яго.
Нагадаем, kgb.by перастаў працаваць у лютым 2024 года. Але толькі праз два месяцы, 26 красавіка, «Кіберпартызаны» раскрылі прычыну.
— Мы прабраліся туды яшчэ ўвосень 2023 года і выпампавалі ўсю даступную інфармацыю. На жаль, трохі «нашумелі», таму сайт давялося прыкрыць, — заяўлялі яны тады. І ў якасці доказу размясцілі ў сваім тэлеграм-канале спіс адміністратараў пляцоўкі, а таксама базу дадзеных і логі сервера.
За дзень да заявы хакераў кіраўнік КДБ Іван Церцель падчас Усебеларускага народнага сходу паскардзіўся на іх Аляксандру Лукашэнку. Пасля дакладу спецслужбіста палітык заклікаў чыноўнікаў «рэгулярна мяняць паролі на камп’ютарах».
— Звярніце ўвагу на кібератакі, многае ў іх атрымліваецца, бо мы пачварна, нядбала ставімся да працы з рознага роду сістэмамі, камп’ютарамі і гэтак далей, — сказаў Лукашэнка. — Некаторыя нават па два-тры гады не мяняюць паролі ў сваіх сетках і камп’ютарах. За гэта ўжо трэба несці крымінальную адказнасць. І нехта будзе несці.
Чытайце таксама
