Беларускія студэнты сутыкаюцца з новай праблемай падчас навучання ў польскіх ВНУ па спецыяльнасцях, якія прадугледжваюць працу з дзецьмі: у іх патрабуюць даведкі пра несудзімасць. Падача такіх дакументаў праблематычная для тых, хто сутыкаўся на радзіме з палітычным пераследам, піша MOST.
Змены ў правілах навучання звязаныя з прынятымі папраўкамі да польскага закона «Пра супрацьдзеянне сэксуальным злачынствам і абарону няпоўнагадовых». Так званы закон Камілка, названы па імені хлопчыка, які загінуў пасля здзекаў айчыма, уводзіць дадатковыя меры абароны дзяцей. Яны датычаць у тым ліку супрацоўнікаў, якія ў працэсе працы маюць кантакт з няпоўнагадовымі, і будучых прадстаўнікоў гэтых прафесій, што праходзяць практыку. Працоўныя адносіны з такімі супрацоўнікамі не могуць быць заключаныя, калі яны былі асуджаныя за злачынствы на сэксуальнай глебе ці на глебе наркотыкаў. Таму цяпер яны павінныя паказаць даведку пра адсутнасць судзімасці.
Закон датычыць перш за ўсё педагагічных работнікаў, але таксама медсясцёр і дактароў, абслуговага персаналу дзіцячых установаў.
Закон не прадугледжвае выключэнняў для замежных студэнтаў, піша Onet. Калі краіны, адкуль яны прыязджаюць, вядуць адпаведны рэестр злачынстваў, яны павінныя падаць даведкі. Гэта можа быць праблемай для тых, каму небяспечна вяртацца ў Беларусь або прасіць такія дакументы.
У Ягелонскім універсітэце ў Кракаве, напрыклад, даведкі пра несудзімасць патрабуюцца для праходжання практыкі падчас навучання на дзесяці напрамках. Гэта спецыяльнасці, якія патрабуюць праходжання практыкі ў школах ці бальніцах. Універсітэт патрабуе падаць дакументы да 1 кастрычніка. Студэнты, якія не могуць паказаць неабходныя дакументы, маюць права папрасіць пра адтэрміноўку практыкі з няпоўнагадовымі на наступныя семестры, аднак гэта будзе толькі часовым рашэннем праблемы.
Чытайце таксама
