Дзяржкантроль праводзіць маштабныя праверкі харчовых рынкаў Беларусі. Якія парушэнні там часцей за ўсё знаходзяць і як падманваюць пакупнікоў, расказалі кантралёры ў эфіры дзяржтэлеканала «Беларусь 1».
Падчас рэйдаў кантралёры правяраюць выкананне заканадаўства, якасць і бяспеку тавараў, дакументы, а таксама шукаюць неабгрунтаваных пасярэднікаў. Сярод галоўных парушэнняў — завышэнне цэн, продаж прадуктаў без дакументаў, неналежныя ўмовы захоўвання.
У прыватнасці, на адным са сталічных рынкаў кантралёры заўважылі, што на прылаўках няма цэннікаў і занадта шмат прадуктаў — каб не былі відаць вагі.
«Чаму ў вас прадукцыя закладзеная так, што ў вас не відаць чары вагаў? Не мусіць быць так. Я як пакупнік гляджу і не бачу, як у вас будзе працэс узважвання адбывацца. Пакупнік, спажывец мусіць бачыць, як вы ўзважваеце», — паказаў на парушэнне прадаўцу прадстаўнік КДК.
Паводле яго, тавар не мусіць закрываць шалі, каб пакупніка не маглі абважыць.
Пры гэтым абважваць усё ж удаецца. Як расказала намесніца начальніка аддзела Камітэта дзяржкантролю Беларусі Таццяна Самохіна, на адным з гандлёвых месцаў, дзе прадавалі каўбасу, былі заўважаныя свінцовыя грузікі вагой 222 грамы (тры грузы 102 грамы, 70 грамаў, 50 грамаў), якія ляжалі ў зоне вагаў. Прадаўцы выкарыстоўвалі іх падчас узважвання тавару, каб павялічыць вагу і падмануць пакупнікоў.
Яшчэ адно частае парушэнне — завышэнне цэн. Паводле кантралёраў, прадаўцы часцей за ўсё неабгрунтавана накручвалі цану садавіны і гародніны.
Так, у адным з гандлёвых пунктаў на рынку кантралёры выявілі чатырохразовае завышэнне цаны на персікі і трохразовае — на нектарыны. У Дзяржкантролі адзначылі, што часта завышаюць цэны на памідоры.
«6,76, а ў вас 9,50, тут завышэнне будзе на таматы. Дысцыпліна цэн тут не выконваецца, мяркуючы з атрыманых дакументаў», — сказаў прадстаўнік КДК прадаўцу падчас праверкі.
Былі выяўленыя выпадкі, калі на рынках прадавалі чарэшню незразумелага паходжання. Прадавец паказаў кантралёрам дакументы на ягаду за студзень мінулага года.
На адным з рынкаў на ўскраіне Мінска знайшлі антысанітарыю, уборка там не праводзілася вельмі даўно, прадаўцы сядзяць у гразі, а ўбачыўшы кантралёраў, некаторыя проста кідаюць свае месцы і ўцякаюць.
У Дзяржкантролі адзначылі, што па выніках рэйдаў зменяць некаторыя працэдуры па продажы месцаў на рынках, каб зменшыць колькасць парушэнняў.
Таксама кантралёры праверылі, ці ёсць на рынках месцы для тых, хто прадае гародніну і садавіну, выгадаваную на сваім участку. Бясплатна такія месцы могуць атрымаць людзі з інваліднасцю, пенсіянеры і маламаёмасныя, калі збяруць дакументы. Аднак некаторыя аптовыя гандляры бралі такія даведкі і прадавалі прадукцыю, выгадаваную далёка за межамі Беларусі, пад выглядам ураджаю з уласнага надзелу.