Суд Маскоўскага раёна Мінска 18 сакавіка вынес прысуд ужо былому дырэктару УКБ «Захад» за хабарніцтва ў асабліва буйным памеры, паведамляе прэс-служба суда.
Яго абвінавачвалі ў тым, што ў 2019−2020 гадах ён, займаючы пасаду дырэктара УКБ «Захад», за некалькі прыёмаў прыняў хабару на агульную суму не менш чым 110 000 беларускіх рублёў ад прадстаўнікоў ТАА «Сталёвая сфера».
Сваю віну ўжо былы дырэктар УКБ «Захад» прызнаў часткова. Суд палічыў змякчальнай акалічнасцю тое, што мужчына добраахвотна выплаціў даход, атрыманы злачынным спосабам.
Яго прызналі вінаватым па ч. 3 арт. 430 (Атрыманне хабару ў асабліва буйным памеры) КК Беларусі і асудзілі на 7,5 года калоніі ўзмоцненага рэжыму і штрафу — 160 000 рублёў.
Прысуд у законную сілу не ўступіў і можа быць абскарджаны і апратэставаны ва ўстаноўленым заканадаўствам парадку.
Нагадаем, пра завядзенне крымінальнай справы супраць былога дырэктара УКБ стала вядома ў кастрычніку 2022 года. Тады справу завялі па артыкуле пра злоўжыванне службовымі паўнамоцтвамі: згодна з яе матэрыяламі, кіраўніцтва УКБ з парушэннем парадку правядзення тэндару выбрала генпадрадчыкам для катэджаў фірму, якая раней займалася толькі рамонтам офісаў, на будаўніцтве не было належнага тэхнагляду. У выніку дамы былі пабудаваныя няякасна, з мноствам недахопаў. Ведаючы пра дрэнную якасць будаўніцтва, дырэктар УКБ у 2020−2021 гадах усё роўна прымаў і аплачваў працы.
Пазней у МУС таксама паведамілі, што дырэктара абвінавачваюць яшчэ і ў атрыманні хабару — але тады ў МУС называлі суму 120 тысяч рублёў. У лютым 2023 года генпракурор Андрэй Швед паведамляў пра хабар на 110 тысяч рублёў.
«Генеральнай пракуратурай распачатая крымінальная справа ў дачыненні да дырэктара УКБ „Захад“, які арганізаваў прыёмку і аплату генпадрадчыку няякасна выкананых работ па больш чым 20 дамах, пры гэтым атрымаўшы хабар у суме 110 тысяч рублёў», — расказваў Швед.
Будаўніцтва дамоў для шматдзетных сем’яў, якія стаяць у чарзе на льготнае жыллё, пачалося ў пасёлку Сокал некалькі гадоў таму. Цяпер у эксперыментальным катэджным пасёлку ўзведзена ўжо больш за 80 дамоў, іх прапануюць купіць не толькі ільготнікам, але і ўсім ахвочым. У 2022 годзе жыхары катэджаў скардзіліся СМІ на якасць дамоў — працяканне дахаў і іншыя праблемы. Паводле іх словаў, праблема на ўзроўні забудоўшчыка ніяк не вырашалася. У выніку жыхары звярнуліся да Лукашэнкі.