Суд Полацкага раёна і Полацка 28 лютага разгледзеў справу дырэктаркі Полацкага дзяржаўнага прафліцэя сельгасвытворчасці Ірыны Кісялёвай, якую абвінавачвалі ў перавышэнні службовых паўнамоцтваў і злоўжыванні імі, піша тэлеграм-канал «Віцебск, я гуляю».
Паводле матэрыялаў судовага паседжання, жанчына ў студзені 2019 года, займаючы пасаду дырэктаркі прафліцэя і карыстаючыся сваімі паўнамоцтвамі, фіктыўна працаўладкавала ў гэтую навучальную ўстанову свайго сужыцеля, прычым на пасаду з высокім заробкам. У выніку са студзеня 2019 года да верасня 2021 года «ліпаваму супрацоўніку» неабгрунтавана налічылі заробак і іншыя выплаты агульнай сумай 28 495,20 рубля.
Аднак гэтага «дадатковага заробку» ёй, мяркуючы з усяго, было мала. Жанчына забірала частку заробку ў супрацоўнікаў установы, якой кіравала. Так, з сакавіка 2019 года да кастрычніка 2022 года яна сістэматычна і незаконна патрабавала ад сваіх сямі падначаленых, каб яны самі або праз іншых работнікаў аддавалі ёй частку свайго заробку для пакрыцця за іх кошт фінансавых патрэбаў узначаленага ёю прафліцэя. Такім чынам яна прысвоіла не менш за 6470 рублёў.
У выніку суд прызнаў яе вінаватай у перавышэнні ўлады і службовых паўнамоцтваў і злоўжыванні імі і прызначыў ёй пакаранне ў выглядзе пазбаўлення волі на тры гады без штрафу з пазбаўленнем права займаць кіраўнічыя пасады цягам пяці гадоў. Ёй далі адтэрміноўку на два гады.
Прысуд суда не ўступіў у законную сілу і можа быць абскарджаны.
Цікава, што Ірына Кісялёва ў сакавіку 2022 года была названая «Жанчынай года — 2021» у намінацыі «Паспяховы кіраўнік». Яе кандыдатуру выбралі Віцебская абласная арганізацыя ГА «Беларускі саюз жанчын» і Віцебскі аблвыканкам.
Акрамя таго, у яе ёсць дыплом «Чалавек года Віцебшчыны» за 2014 год, некалькі ўзнагародаў Міністэрства адукацыі, граматы і падзякі рознага ўзроўню.