Начальніка аддзела спорту і турызму Жлобінскага райвыканкама Яўгена Ахрэменку 28 снежня 2023 года асудзілі на 15 сутак арышту, паведамілі гомельскія праваабаронцы. Пасля суда мужчыну звольнілі з працы.
Яўгена Ахрэменку арыштавалі за лайк, які ён паставіў на адной са старонак у Instagram, прызнаных экстрэмісцкімі. Справу па ч. 2 арт. 19.11 КаАП (Распаўсюд экстрэмісцкіх матэрыялаў) разглядала суддзя Наталля Качалава, і працэс быў адкрытым.
Згодна з матэрыяламі суда, Ахрэменка «ў сацыяльнай інтэрнэт-сетцы Instagram на асабістай старонцы адзначыў як упадабаную публікацыю ў суполцы Free_Zhlobin, уключанай у рэспубліканскі спіс экстрэмісцкіх матэрыялаў». Тым самым ён «павялічыў ахоп аўдыторыі для яе прагляду, чым распаўсюдзіў інфармацыйную прадукцыю названай суполкі».
У пасце, які лайкнуў Ахрэменка, аўтары «віншавалі» з днём прафнепрыдатнасці супрацоўнікаў КДБ, адзначаюць праваабаронцы.
Сам Ахрэменка падчас судовага працэсу віну прызнаў часткова і патлумачыў, што гэта было зроблена ненаўмысна, выпадкова. Паводле яго, мэты распаўсюду ён не меў, бо перачытваў публікацыі названай суполкі з мэтай выяўлення і спынення супрацьпраўных дзеянняў з боку падначаленых супрацоўнікаў і спартоўцаў. Але на вынік суда пакаянне чыноўніка не паўплывала, як і тое, што Ахрэменка мае трох няпоўнагадовых дзяцей: 15 сутак арышту з канфіскацыяй мабільнага тэлефона, з дапамогай якога чыноўнік паставіў лайк.
Праваабаронцы адзначаюць, што ў Instagram самога Ахрэменкі кантэнт выключна «ідэалагічна правільны»: граматы ад іншых чыноўнікаў, афіцыйныя мерапрыемствы, спорт. Таму не выключана, што Ахрэменка сапраўды не хлусіў у судзе, але, як можна ўбачыць, гэта нікога не цікавіць, і аналагічныя паводзіны нікога не ўратуюць, падкрэслівае «Гомельская вясна».
Раней пра затрыманне чыноўніка і суд над ім першым напісаў акурат паблік Free Zhlobin. Пазней выданне «Флагшток» звярнулася ў райвыканкам, дзе паведамілі, што Ахрэменкі «няма і не будзе ўжо», бо ён «з пачатку новага года не працуе».
У 2019 годзе Ахрэменка займаў пасаду загадчыка сектара спорту і турызму аддзела адукацыі, спорту і турызму Жлобінскага райвыканкама, як мінімум у 2021 годзе стаў начальнікам профільнага аддзела. Паводле інфармацыі сайта chinovniki.info, у 2019 годзе Ахрэменка быў намеснікам старшыні ўчастковай выбарчай камісіі ўчастка для галасавання № 4 Жлобінскай выбарчай акругі № 40. На пасаду вылучаўся ад праўладнай гомельскай абласной арганізацыі «Сацыял-дэмакратычная партыя народнай згоды».