Міністр адукацыі Андрэй Іванец тыдзень таму анансаваў, што кошт навучання ў ВНУ вырасце ад 3 да 17 працэнтаў. 1 снежня гэта здарылася. На сайтах некаторых універсітэтаў ужо апублікавалі новыя цэны. Паглядзелі, колькі гэта ў рублях.
У Беларускім дзяржаўным медыцынскім універсітэце больш за ўсё цэны паднялі для будучых стаматолагаў. У параўнанні з 1 верасня 2023-га кошт навучання на гэтай спецыяльнасці вырас на 878 рублёў. Тым, хто вучыцца на «Лекавай справе» і «Педыятрыі», плаціць давядзецца на 750 рублёў больш. Цэны ў галоўнай медВНУ краіны памяняліся такім чынам:
| Спецыяльнасць | Цана да падаражання ў рублях | Новая цана ў рублях |
| Лекавая справа | 4430 | 5180 |
| Педыятрыя | 4430 | 5180 |
| Стаматалогія | 5182 | 6060 |
| Медыцынска-прафілактычная справа | 4064 | 4750 |
| Фармацыя (дзённая форма падрыхтоўкі) | 4430 | 5180 |
| Фармацыя (завочная форма падрыхтоўкі) | 1770 | 2070 |
На сайце БДМУ сказана, што даплаціць розніцу ў цане за першае паўгоддзе трэба да 14 студзеня 2024 года. На розных спецыяльнасцях яна складае ад 75 да 219 рублёў.
У Беларускім дзяржаўным універсітэце інфарматыкі і радыёэлектронікі больш за ўсё цэны падскочылі для малодшакурснікаў-вочнікаў факультэта камп’ютарных сістэм і сетак, факультэта інфармацыйных тэхналогій і кіравання, а таксама інжынерна-эканамічнага факультэта. Кошт года навучання тут вырас на 770 рублёў. Было 4590 рублёў, стала 5360. Для параўнання, для трэцякурснікаў некаторых спецыяльнасцяў факультэта радыётэхнікі і электронікі павышэнне склала 467 рублёў — з 2803 да 3270 рублёў.
Даплату за навучанне ў першым паўгоддзі студэнты-платнікі галоўнай IT-ВНУ краіны павінныя ўнесці да 20 снежня. На сайце навучальнай установы таксама сказана, што ў 2023 годзе выдаткі з рэспубліканскага бюджэту на падрыхтоўку спецыяліста з вышэйшай адукацыяй у гэтай ВНУ склалі 8 367,31 рубля.
Нагадаем, раней рэктар БДУІР Вадзім Богуш тлумачыў, як фармуецца цана на навучанне ў ВНУ. Паводле яго словаў, каля 90 прцэнтаў выдаткаў — гэта заробак супрацоўнікаў.
— Рост планавага фонду аплаты працы на 1 верасня 2023 года ў параўнанні з 1 верасня 2022 года склаў 14,2%, — удакладніў рэктар. — Са студзеня 2024 года памер базавай стаўкі для аплаты працы ў бюджэтнай сферы складзе 250 рублёў (рост 6,4% у параўнанні з цяперашнім перыядам, 18,5% — у параўнанні з мінулым годам). Павышэнне базавай стаўкі непасрэдна ўплывае на ўзровень заработнай платы работнікаў бюджэтнай сферы (аклад, стымулявальныя і кампенсавальныя выплаты), што, у сваю чаргу, павялічыць планавы фонд зарплаты работнікаў універсітэта.
Ён таксама адзначыў, што павелічэнне кошту навучання звязанае з ростам выдаткаў на ўтрыманне будынкаў, павелічэннем выдаткаў на камунальныя паслугі, ростам цэн на энерганосьбіты, павышэннем цэн на паслугі іншых арганізацый.
Нагадаем, у жніўні 2023-га міністр адукацыі Іванец заявіў, што ў Беларусі няма платнай адукацыі, а тое, што ёю лічыцца, — гэта форма сацпадтрымкі моладзі і датуецца дзяржавай.
Чытайце таксама
