У Беларусі абнавіўся пералік «экстрэмісцкіх фарміраванняў» — туды занеслі тэлеграм-чат «Шклов 97%», студэнцкую арганізацыю «Задзіночанне беларускіх студэнтаў» і праект дапамогі беларускім добраахвотнікам ва Украіне Prague Support Team.
Шклоўскі паблік уключаны ў спіс па рашэнні МУС ад 26 верасня. Астатнія два найменні — па рашэнні КДБ ад 21 верасня.
«Задзіночанне беларускіх студэнтаў» узнікла на хвалі перабудоўных настрояў яшчэ ў канцы 80-х гадоў як нефармальнае аб’яднанне беларускіх студэнтаў. У 1992 годзе яго зарэгістравалі ў Мінюсце афіцыйна, але ўжо ў 2001-м пазбавілі рэгістрацыі, і яно працягнула дзейнасць падпольна.
У 2020-м сябры аб’яднання бралі актыўны ўдзел у акцыях пратэсту. 12 лістапада 2020 года ў сямі актывістаў былі праведзеныя ператрусы, самі яны былі затрыманыя і дастаўленыя ў КДБ. Сярод іх — сябра Каардынацыйнай рады, прадстаўніца Святланы Ціханоўскай па справах моладзі і студэнтаў Алана Гебрэмарыям, Ксенія Сырамалот, Кася Будзько і іншыя.
Пасля многія актывісты перабраліся за мяжу і працягваюць дзейнасць дыстанцыйна.
Prague Support Team — праект беларусаў у Чэхіі, які дапамагае беларускім добраахвотнікам ва Украіне.