Міністэрствы абароны і аховы здароўя працуюць над карэктаваннем патрабаванняў да стану здароўя асобаў, якія паступаюць на вайсковую службу, і пералікам захворванняў, на падставе якіх людзей прызнаюць не прыдатнымі да службы ў войску. Пра гэта заявілі ў Мінабароны 20 студзеня.
Змены будуць адносіцца да ўсіх катэгорый вайскоўцаў — тэрміновай службы, кантрактнікаў, рэзервістаў, студэнтаў ваенных ВНУ.
— Гэта выклікана шэрагам аб’ектыўных прычын. І ў першую чаргу тым, што паступае вялікая колькасць зваротаў грамадзян, якія лічаць, што патрабаванні да стану здароўя значна завышаныя і не дазваляюць маладым людзям рэалізаваць мару стаць вайскоўцам, — заявіла намесніца начальніка медчасткі Галоўнага ваеннага клінічнага медыцынскага цэнтра УС РБ, падпалкоўнік медыцынскай службы Святлана Кашура.
Дзейнае заканадаўства, сказала яна, не ўлічвае, што ў войскі паступаюць новыя тыпы ваеннай тэхнікі, змяняюцца формы вядзення баявых дзеянняў.
— Банальная плоскаступнёвасць становіцца перашкодай для хлапчука, які хоча паступаць на кантрактную службу без праходжання тэрміновай службы, — адзначыла Кашура.
Яна прывяла яшчэ некалькі прыкладаў: вайскоўца, прыдатнага да службы на пасадзе прапаршчыка, не бяруць у Ваенную акадэмію для далейшага навучання праз малаважнае захворванне або стары юнацкі дыягназ; маладых людзей пасля кадэцкага вучылішча не бяруць у ваенныя ВНУ праз невялікае зніжэнне зроку, якое карэктуецца лінзамі; не прымаюць у войска хлопцаў з невялікай лішнім вагой, нават калі яны займаюцца сілавымі відамі спорту і маюць вялікую мышачную масу.
— Таксама ёсць пералік захворванняў, якія ў 90-х гадах, калі на ўзбраенні стаялі іншыя ўзоры тэхнікі, не дазвалялі маладому чалавеку выканаць свой вайсковы абавязак. Сёння, з развіццём высокіх тэхналогій, з такімі захворваннямі цалкам паспяхова можна выконваць абавязкі аператара сістэм СПА альбо аператара спадарожнікавай сістэмы сувязі, — заявіла падпалкоўнік.
— Мы ўдумліва і разважліва разгледзелі гэтыя спрэчныя моманты для ўнясення адпаведных змяненняў у пералік захворванняў, — паведаміла Кашура. — Акрамя таго, унясенне змяненняў дасць магчымасць не ганяць людзей лішні раз па медыцынскіх установах дзеля нязначных абследаванняў, што разгрузіць цывільных медработнікаў. Тут важна выконваць баланс: і людзей не пакрыўдзіць, і дазволіць служыць тым, хто сапраўды зможа выконваць задачы па стане здароўя.