Суд Лідскага раёна асудзіў палітвязня Валерыя Тумілевіча, які абвінавачваўся ў абразе Лукашэнкі, на 1,5 года калоніі агульнага рэжыму, паведамляе праваабарончы цэнтр «Вясна».
Палітвязень Валерый Тумілевіч быў затрыманы 17 ліпеня на мяжы, калі вяртаўся з Польшчы ў Беларусь. Мужчыну далі 10 сутак адміністрацыйнага арышту па артыкуле 19.11 КаАП (распаўсюд экстрэмісцкіх матэрыялаў), але на волю ён так і не выйшаў. Супраць Тумілевіча распачалі крымінальную справу паводле арт. 368 КК (абраза Лукашэнкі) — нібыта ён абразіў яго, калі знаходзіўся за мяжой.
Згодна з абвінаваўчым актам, Валерый Тумілевіч, знаходзячыся ў нявысветленым месцы, у мэсэнджары Telegram, з’яўляючыся актыўным удзельнікам чатаў «Гордые лидчане чат» і «Чат 97% ДКЖ», «размясціў некалькі паведамленняў з непрыстойнымі па форме і зневажальнымі па накіраванасці словамі, якія даюць адмоўную ацэнку Лукашэнку, зневажаюць яго гонар і годнасць».
У судзе Валерый Тумілевіч цалкам прызнаў сваю віну. Суддзя Аляксандр Мішураў асудзіў яго на адзін год і шэсць месяцаў пазбаўлення волі ў калоніі агульнага рэжыму. Да суда лідчанін утрымліваўся ў СІЗА № 1 Гродна.
8 лістапада Гродзенскі абласны суд адхіліў апеляцыйную скаргу на прысуд.