Аляксандр Лукашэнка, які 25 лютага, адказваючы на пытанне, ці пойдзе ён на выбары прэзідэнта ў 2025 годзе, сказаў «пайду-пайду-пайду», на сустрэчы з актывам Беларускага саюза жанчын (БСЖ) 5 сакавіка раптам заявіў, што яго няправільна зразумелі.
— Нехта там задаваў пытанне: «Ці пойдзеце вы на выбары?» Я там не даслухаў і [адказаў]: «Пайду-пайду». Гэта не значыць, што я ўжо вырашыў і прыняў рашэнне. Проста ім хацеў сказаць: «Ды пайду, супакойцеся вы». Гэта не значыць, што я сказаў, там «пайду» ці «не пайду». Усё будзе залежаць ад таго, як мы падыдзем да гэтых выбараў. А раптам аб’явіцца чалавек, якому мы можам даверыцца. Але ўсякае можа быць, — апраўдаўся палітык.
Ён таксама чарговым разам падкрэсліў, што Усебеларускі народны сход стварылі «не для Лукашэнкі».
— Я наеўся вось так гэтай працы. Слухайце, гэта найцяжэйшая праца. Калі ты спаць кладзешся — думаеш пра гэта, калі ты не спіш — думаеш пра гэта, і прачынаешся раніцай — зноў пра гэта, — паскардзіўся Аляксандр Лукашэнка.
Пры гэтым палітык падкрэсліў, што ён «не вечны», і паабяцаў актыву БСЖ, што беларусы будуць жыць «пры новым прэзідэнце», але не ўдакладніў калі.
Чытайце таксама
