У фонд Аляксандра Лукашэнкі з рэспубліканскага бюджэту накіруюць амаль 1 млрд рублёў, вынікае з праекта закона пра бюджэт на 2024 год. Гэта ў паўтара разу больш, чым год таму.
Як вырасце фонд Лукашэнкі
У фонд Аляксандра Лукашэнкі з бюджэту ў 2024 годзе вылучаць на 335,5 млн рублёў больш, чым сёлета, вынікае з праекта закона. Памер фонду складзе 999 млн 658 тыс. рублёў — гэта 2,5% ад усіх даходаў рэспубліканскага бюджэту. Большы памерам ён быў толькі двойчы — у 2022 годзе (1,169 млрд) і ў 2018 годзе (1,2 млрд).
Для таго каб сфармаваць гэты фонд у такім памеры, чыноўнікі чарговым разам адмянілі дзеянне артыкула Бюджэтнага кодэкса (які ў іерархіі нарматыўных актаў стаіць вышэй за закон), што абмяжоўвае максімальныя сумы для рэзервовых фондаў і дзе прапісаныя мэты, на якія гэтыя грошы могуць накіроўвацца.
Артыкул 42 Бюджэтнага кодэкса: «Агульны памер рэзервовых фондаў у рэспубліканскім бюджэце не можа перавышаць 2% уласных даходаў рэспубліканскага бюджэту без уліку даходаў дзяржаўных мэтавых бюджэтных фондаў». А ў артыкуле 43 Бюджэтнага кодэкса гаворыцца, што памер фонду прэзідэнта не можа перавышаць 1% даходаў бюджэту.
На што выдаткуюць грошы з гэтага фонду
У праекце закона ўказа пра рэспубліканскі бюджэт гаворыцца, што сродкі з гэтага фонду выдаткоўваюцца на павышэнне заробкаў пэўнай катэгорыі работнікаў:
- дзяржаўным цывільным службоўцам;
- работнікам бюджэтных арганізацый і іншых арганізацый, якія атрымліваюць субсідыі, работнікі якіх прыроўненыя па аплаце працы да работнікаў бюджэтных арганізацый;
- грашовага забяспечання вайскоўцам, асобам начальніцкага і шараговага складу органаў і падраздзяленняў.
Усе гэтыя групы работнікаў і так атрымліваюць заробкі з бюджэту, для чаго неабходна прапускаць частку гэтых грошай праз фонд Лукашэнкі, чыноўнікі не тлумачылі.
Акрамя таго, гэтыя грошы могуць выкарыстоўваць на пенсійнае забяспечанне вайскоўцаў, асоб начальніцкага і шараговага складу органаў і падраздзяленняў. А таксама на фінансаванне будаўніцтва або рэканструкцыі дарог, а таксама аб’ектаў, уключаных у рэгіянальныя інвестыцыйныя праграмы.
Нагадаем, з сярэдзіны 2022 года Мінфін перастаў даваць справаздачу грамадзянам пра тое, як выдаткоўваюцца сродкі бюджэту. Адпаведна, як траціліся сродкі з казны, а таксама з падобных фондаў сёлета, невядома.
Чытайце таксама
