Павысіўшы ключавую стаўку, Цэнтрабанк Расіі дапамог беларускаму рублю на валютным рынку. Але гэта не зніжае ўнутраных рызык і дысбалансаў, якія назапасіліся ў беларускай эканоміцы. Як змяненне ключавой стаўкі ў РФ адаб’ецца на беларускім валютным рынку і ці чакаць умацавання беларускага рубля, «Люстэрку» патлумачыла старшая навуковая супрацоўніца даследчага цэнтра BEROC Анастасія Лузгіна.
На што ўплывае ключавая стаўка ў Расіі і пры чым тут Беларусь
Беларусь і Расія — дзве асобныя краіны, кожная са сваёй эканомікай і ўласнай манетарнай палітыкай. Але цесная сувязь і нават залежнасць эканомік прывяла да таго, што ключавыя змены ў Расіі ўплываюць і на Беларусь. 15 жніўня Цэнтрабанк РФ на пазачарговым сходзе прыняў рашэнне павысіць ключавую стаўку з 8,5% адразу да 12%. Гэта сведчыць пра ўзмацненне жорсткасці манетарнай палітыкі.
Змена стаўкі ў суседняй краіне звязаная з актыўным падзеннем расійскага рубля на валютным рынку ў РФ, які перавысіў 14 жніўня псіхалагічную адзнаку 100 рублёў за даляр. Павышэнне стаўкі, як чакае Цэнтрабанк РФ, будзе спрыяць стабілізацыі сітуацыі. З яе ростам будзе павялічвацца кошт крэдытаў і дэпазітаў у расійскіх рублях, тлумачыць эканаміст Анастасія Лузгіна. Гэта мусіць прывесці да росту цікавасці да зберажэнняў і трохі саб’е прывабнасць крэдытаў. У выніку гэта можа адбіцца на зніжэнні імпарту, ва ўсякім выпадку той яго долі, на якую бізнес бярэ крэдыты.
— Апасродкавана ўзмацненне жорсткасці грашова-крэдытнай палітыкі ў Расіі будзе на нас адбівацца, перш за ўсё, праз валютны рынак. Як? Калі пасля гэтага рашэння курс расійскага рубля стабілізуецца (а можа, і трохі ўмацуецца) да даляра і еўра, то аналагічная сітуацыя адбудзецца і з беларускім рублём. Бо беларускі рубель апошнім часам зазнаваў уплыў менавіта расійскага — і ішоў за яго дынамікай. То-бок мы можам убачыць стабілізацыю нашага рубля да даляра і еўра ці нават пэўнае ўмацаванне, — тлумачыць Анастасія Лузгіна.
Уплыў будзе не толькі на курс рубля, але гэта не вырашае ўнутраных праблем
У 2023 годзе, у той час як беларускі рубель зніжаўся да даляра і еўра, ён умацоўваўся да расійскага. Гэта негатыўна ўплывала на канкурэнтаздольнасць беларускіх тавараў, якія прадаюцца ў Расіі.
— Калі цяпер гэты трэнд спыніцца і адбудзецца стабілізацыя рубля, канкурэнтаздольнасць як мінімум не будзе пагаршацца, — кажа эканаміст.
Па сутнасці, Цэнтрабанк Расіі зрабіў тое, што незалежныя эканамісты лічылі неабходным у Беларусі, — пачаў узмацненне жорсткасці манетарнай палітыкі. Гэта, як адзначалася вышэй, станоўча адаб’ецца і на тым, як сябе будзе адчуваць беларускі рубель на ўнутраным рынку валют. Але гэта ніяк не вырашае ўнутраных рызык і дысбалансаў, што назапасіліся ў беларускай эканоміцы ў сувязі з таннымі крэдытамі, больш высокім павелічэннем даходаў у параўнанні з агульным ростам эканомікі ў цэлым і, адпаведна, актывізацыяй унутранага попыту. Так што рызыка паскарэння інфляцыі і магчымасці дэвальвацыі ў Беларусі захоўваецца, адзначае Анастасія Лузгіна.
Чытайце таксама
