У 2024 годзе па разліку і выплаце бальнічных увядуць змены. Адно з новаўвядзенняў датычыць тых, хто працуе на некалькіх працах. У Мінпрацы расказалі дэталі таго, што зменіцца для такіх людзей.
Цяпер дапамога прызначаецца толькі па тых месцах працы, па якіх работнік падаў дакумент, што пацвярджае часовую непрацаздольнасць. Аднак чыноўнікі плануюць, што права на бальнічныя будуць вызначаць пры ўмове непрацаздольнасці па ўсіх месцах працы.
Кіраўнік Фонду сацыяльнай абароны насельніцтва Юлія Берднікава на прэс-канферэнцыі ў БЕЛТА 7 чэрвеня патлумачыла, што бальнічныя будуць прызначацца толькі па асноўным месцы працы, але з улікам заробку ва ўсіх працадаўцаў, у тым ліку былых. Сёння гэта так: калі чалавек захворвае, ён дае лісток часовай непрацаздольнасці па сваім асноўным месцы працы, і працадаўца прызначае дапамогу па часовай непрацаздольнасці. Пры гэтым ФСАН забяспечвае працадаўцу двума параметрамі: працягласць выплаты ўнёскаў у бюджэт фонду і памер сярэднядзённага заробку.
З 1 студзеня 2024 года функцыю разліку дапамог бярэ на сябе ФСАН. Разлік будзе весціся з улікам заробку не толькі па асноўным месцы працы. У разлік будуць браць усе дзейныя, а таксама папярэднія ў разліковым перыядзе месцы працы.
«У новых умовах права на бальнічны будзе вызначацца пры ўмове непрацаздольнасці па ўсіх месцах працы, — падкрэсліла Юлія Берднікава. — Калі чалавек захворвае і ў яго некалькі месцаў працы, неабходна, каб перыяд непрацаздольнасці быў адлюстраваны па кожным месцы працы — як па асноўным, так і па сумяшчальніцтве. Калі складуцца ўмовы, што па асноўным месцы працы ён знаходзіўся на бальнічным, але па сумяшчальніцтве ўсё ж выконваў працоўную функцыю, дапамога па непрацаздольнасці яму не будзе належаць, бо ў гэты перыяд ён не страціў цалкам заробак».
Яшчэ адно з новаўвядзенняў заключаецца ў павелічэнні перыяду, за які бярэцца зарплата для разліку гэтых выплат — з цяперашніх 6 да 18 месяцаў. Нагадаем, раней высветлілася, што першапачаткова чыноўнікі хацелі падняць планку яшчэ вышэй, але гэта выклікала супраціў афіцыйных прафсаюзаў. На іх думку, гэта прывяло б да заніжэння выплат, у тым ліку праз інфляцыю і паступовы рост заробкаў.
7 чэрвеня Юлія Берднікава паведаміла на прэс-канферэнцыі, што цяпер у разліковы перыяд, які вызначае дапамогу па часовай непрацаздольнасці, уваходзіць заробак за 6 каляндарных месяцаў. У новых умовах ён пашырыцца да 18 каляндарных месяцаў, што папярэднічаюць кварталу, у якім наступіў выпадак часовай непрацаздольнасці або цяжарнасці і родаў. Пры гэтым будзе ўлічвацца заробак па ўсіх месцах працы, дзе грамадзянін быў працаўладкаваны і выконваў працоўную функцыю, за якую выплачваліся ўнёскі ў бюджэт ФСАН.
