Аляксандр Лукашэнка запатрабаваў ад адказных за ахову здароўя звярнуць увагу на якаснае лячэнне пацыентаў у рэгіёнах, раскрытыкаваў сістэму падрыхтоўкі медкадраў і распарадзіўся навесці парадак з лекамі. Такое даручэнне ён даў 23 траўня на нарадзе па ахове здароўя.
Апошнім часам пачало паступаць шмат сігналаў пра зніжэнне якасці аказання медыцынскай дапамогі, ды і папросту пра адсутнасць належнага парадку ва ўстановах аховы здароўя, адзначыў палітык. Гэтыя факты вывучала створаная на даручэнне Лукашэнкі незалежная рабочая група, куды ўвайшлі не чыноўнікі, а менавіта спецыялісты ў сферы медыцыны. Кіравала групай Ірына Абельская — у мінулым асабісты доктар Аляксандра Лукашэнкі, а цяпер — кіраўніца лечкамісіі. Раней медыя неаднаразова называлі яе меркаванай маці малодшага сына палітыка Мікалая, аднак афіцыйна гэтая інфармацыя не пацверджаная.
— З боку дзяржавы робіцца ўсё магчымае. Сродкі на медыцыну — рамонт, абсталяванне, заробкі, лекі — вылучаюцца каласальныя. Людзі маюць права бачыць аддачу, — сказаў Лукашэнка.
Як вострую праблему ён адзначыў даступнасць і якасць медыцынскай дапамогі ў вёсцы.
— Я вам ніколі сяла не дарую. Ніколі! Запомніце гэта. Перш за ўсё губернатары. Я з вас шкуру сарву, але вы наведзяце там парадак! Куды глядзяць губернатары? Бо гэта іх, перш за ўсё, сфера адказнасці — культура, спорт, адукацыя, ахова здароўя. Бальніцы і школы ў вас жа. Куды глядзяць начальнікі ўпраўленняў аховы здароўя? І наогул, навошта яны вам пры такой працы? Кіраўнікі цэнтраў гігіены, старшыні райвыканкамаў… Урад, Мінздароўя ведаюць пра гэтыя праблемы ці не? А вось ведаць і кантраляваць вы павінныя, — падкрэсліў Лукашэнка.
Ён таксама расказаў, што яго больш за ўсё здзівіла з выяўленых у ахове здароўя праблем:
— Тое, што дагэтуль ёсць абуральныя праблемы бардаку ў бальніцах, паліклініках, ФАПах: сцены і столі руйнуюцца, дзверы пакасіліся, элементарныя санітарныя правілы не выконваюцца. Слухайце, любая ўстанова аховы здароўя мусіць быць узорам санітарыі. Прычым такое здараецца нават у педыятрычных аддзяленнях. Паслухайце, але там жа дзеці! Ці гэта не вашыя дзеці? Вядома, гэта не вашыя дзеці. Але гэта мае дзеці! — сказаў Аляксандр Лукашэнка.
Ён асобна закрануў тэму аптымізацыі фельчарска-акушэрскіх пунктаў. Аляксандр Лукашэнка запатрабаваў падыходзіць да пытання «ўзважана, абдумана, грунтуючыся ў першую чаргу на інтарэсах людзей і мэтазгоднасці».
— Закрывайце, аптымізуйце, ніхто не супраць. Але вы ж спачатку комплексы на колах завязіце, якімі вы хочаце замяніць ФАПы (гаворка пра перасоўныя медыцынскія комплексы. — Заўв. рэд.), а потым закрывайце.
Што да аргументу пра эканомію фінансавых сродкаў за кошт аптымізацыі ФАПаў, то Лукашэнка заўважыў, што выдаткі на іх утрыманне не такія вялікія, раз штат супрацоўнікаў там зусім невялікі.
— І што, нам так дарагія гэтыя ФАПы? Адзін чалавек ходзіць, фельчар, — сказаў Аляксандр Лукашэнка.
Падрыхтоўка медкадраў таксама «кульгае»
Палітык таксама даручыў ліквідаваць недахопы ў падрыхтоўцы дактароў.
— Яшчэ адно адкрыццё для мяне — недастатковы ўзровень падрыхтоўкі і прафесіяналізму дактароў. Неяк гэта не адпавядае запатрабаванасці нашых спецыялістаў не толькі ў Расіі, але і ў Еўропе. Выпрацаваць трэба сістэму патрабаванняў ад рэктараў ВНУ. Яны ў нас недатыкальныя, — адзначыў Лукашэнка.
Ён запатрабаваў далажыць, што не так у пытаннях кваліфікацыі і падрыхтоўкі медыкаў, у чым прычыны, дзе недапрацоўваюць медыцынскія ўніверсітэты.
— Хіба не павінныя РНПЦ, абласныя бальніцы аказваць гэтым спецыялістам метадычную дапамогу, вучыць і кантраляваць іх? У тым ліку своечасова падключацца да лячэння цяжкіх хворых, — заўважыў Аляксандр Лукашэнка. — Не трэба іх цягнуць кучай у БелМАПА (Беларуская медыцынская акадэмія паслядыпломнай адукацыі. — Заўв. рэд.) на павышэнне кваліфікацыі. Вязіце ў РНПЦ. І заплаціце тым, хто будзе вучыць гэтае звяно раённае, з абласных бальніц і гэтак далей. Там трэба вучыць! Са скальпелем і эндаскопам у руках. Каб яны бачылі, як гэта робіцца. І прарабілі гэтыя складаныя аперацыі, маніпуляцыі, навучыліся таму, што ўмеем мы наверсе. У нас абсалютны разрыў вось гэтых верхніх навукова-практычных цэнтраў з сярэднім і ніжнім звяном.
Па леках — таксама бардак
Яшчэ адной падставай для абурэння Лукашэнкі стала пытанне нарошчвання долі айчынных лекаў: ляжым і не варушымся.
— З лекамі поўны бардак. Хто хоча — той бярэ, хто хоча — той нясе, куды захоча — туды і нясе, — выказаўся Аляксандр Лукашэнка.
Асобна ён спытаў пра меры, якія прымаюцца для пашырэння айчыннай вытворчасці запатрабаваных прэпаратаў. Апошнім часам гэтаму пытанню не надаецца належнай увагі.
— За часамі Жарко (Васіль Жарко, былы міністр аховы здароўя. — Заўв. рэд.) далажылі: больш за 50% пачалі вырабляць уласных прэпаратаў. І спыніліся, ляжым і не варушымся, — абазначыў праблему Лукашэнка.
І з дарагім медабсталяваннем ёсць дзе-нідзе праблемы
Лукашэнка звярнуў увагу, што ёсць выпадкі прастойвання дарагога сучаснага медабсталявання.
— А часам гэта адзіны шанец на выратаванне чыёгосьці жыцця! — звярнуў увагу кіраўнік дзяржавы.
Ён агучыў факты, што часам такое абсталяванне прастойвае некалькі гадоў без рамонту.
— І міністр аховы здароўя мне бойка адважваецца дакладваць, што ў яго ўсё ў парадку, у яго ўсё схоплена, ён усё адрамантаваў, у яго запчастак хапае. А хтосьці на нейкія санкцыі пачынае спасылацца. Хлопцы, няма для вас санкцый. Няма! — падкрэсліў Аляксандр Лукашэнка.
А хто будзе адказваць?
Лукашэнка адзначыў, што ўдзельнікі нарады мусяць даць аб’ектыўную ацэнку сітуацыі, якая склалася, і вырашыць, што рабіць далей.
— Я вас перасцерагаю ад кругавой парукі тут. Пойдзеце адсюль без партфеляў, і пойдзеце не проста да сябе дадому, а ў іншыя месцы. Патрэбная аб’ектыўная ацэнка таго, што адбываецца. Мы не сабраліся тут хваліць і захвальваць адно аднаго. Прычын для гэтага няма.
Калі па выніках нарады будзе зробленая выснова, што па тых ці іншых напрамках не ўсё добра, то вінаваты ў гэтым не толькі цяперашні міністр Дзмітрый Піневіч:
— Але спытаем і з Караніка (старшыня Гродзенскага аблвыканкама Уладзімір Каранік, які раней займаў пасаду кіраўніка Мінздароўя. — Заўв. рэд.), які рэкамендаваў яго, і ўсю тую групу, якая сёння ў Міністэрстве аховы здароўя працуе. І які кляўся мне. Я не забыў, — прыгразіў Лукашэнка.
На нараду па медыцыне да Лукашэнкі былі запрошаныя міністр аховы здароўя Дзмітрый Піневіч, старшыня камітэта па ахове здароўя Мінгарвыканкама Алена Богдан, дырэктар ДУ «Мінскі навукова-практычны цэнтр хірургіі, транспланталогіі і гематалогіі» Алег Румо, экс-кіраўнік Міністэрства аховы здароўя, а цяпер старшыня Гродзенскага аблвыканкама Уладзімір Каранік. Акрамя таго, у мерапрыемстве ўдзельнічаюць чыноўнікі, начальнікі абласных упраўленняў па ахове здароўя, рэктары медыцынскіх ВНУ, галоўныя дактары бальніц рознага ўзроўню.
Нагадаем, 31 сакавіка падчас паслання беларускаму народу і Нацсходу Аляксандр Лукашэнка паабяцаў «страсянуць» сферу аховы здароўя і «навесці там парадак».
Чытайце таксама
