Беларускі аташэ па пытаннях абароны ў Польшчы найбліжэйшым часам вернецца на радзіму. Пра гэта паведамілі польскаму агенцтву PAP у польскім Міністэрстве замежных справаў.
Такое рашэнне было прынятае ў адказ на выдварэнне з Беларусі афіцэра сувязі польскай памежнай аховы і двух супрацоўнікаў польскага консульства ў Гродне.
— Беларускі аташэ па пытаннях абароны хутка пакіне Польшчу, — сказаў 23 лютага прэс-сакратар польскага знешнепалітычнага ведамства Лукаш Ясіна.
Нагадаем, 17 лютага, МЗС Беларусі выклікала паверанага ў справах Польшчы і запатрабавала скараціць штат генеральнага консульства Польшчы ў Гродне і прывесці яго да колькаснага парытэту з генконсульствам Беларусі ў Беластоку. Таксама беларускі бок заявіў, што «не бачыць сэнсу далейшага знаходжання на сваёй тэрыторыі афіцэра сувязі памежнай службы Польшчы».
Эскалацыя сітуацыі пачалася з таго, што Польшча з 10 лютага прыпыніла працу пункта пропуску «Баброўнікі» на мяжы з Беларуссю ў адказ на вынясенне суровага палітычнага прысуду журналісту, прадстаўніку польскай меншасці ў Беларусі Андрэю Пачобуту (у дадатак мытнікі з пункта «Баброўнікі» былі затрыманыя па абвінавачанні ў садзейнічанні кантрабандзе).
16 лютага Аляксандр Лукашэнка на сустрэчы з журналістамі назваў закрыццё пунктаў пропуску «эканамічнай правакацыяй» і прыгразіў мерамі ў адказ. На наступны дзень МЗС заявіла пра высылку польскіх дыпламатаў, а ўрад Беларусі ўвёў абмежаванні на ўезд грузавікоў польскіх перавозчыкаў: ім цяпер можна заязджаць на тэрыторыю нашай краіны толькі праз беларуска-польскі ўчастак мяжы. Пасля гэтага ў Польшчы прынялі аналагічныя меры.