Прадстаўнік Аб’яднанага пераходнага кабінета (АПК) па міжнародных справах Валерый Кавалеўскі з’явіўся ў эфіры YouTube-канала «Обычное утро». Сярод іншага ён раскзаў пра альтэрнатыўныя пашпарты для беларусаў, якія могуць пачаць выдаваць ужо сёлета, магчымую канкурэнцыю з Радай бяспекі Зянона Пазняка і каліноўцаў, а таксама раскрытыкаваў выказванне Міхаіла Падаляка пра «адсутнасць выразнай антываеннай актыўнасці» беларускіх дэмсілаў.
Пра словы Падаляка наконт сустрэч з Ціханоўскай: «Гэта маніпуляцыі»
Нядаўна прадстаўнік Офіса прэзідэнта Украіны Міхаіл Падаляк заявіў, што афіцыйны Кіеў не лічыць патрэбным развіваць адносіны з беларускімі дэмсіламі, у прыватнасці сустракацца са Святланай Ціханоўскай, бо «не бачыць выразнай антываеннай актыўнасці з боку апазіцыі» — напрыклад, маштабных маніфестацый каля беларускіх пасольстваў у іншых краінах.
Выказванне Падаляка Кавалеўскі назваў «маніпуляцыямі», закліканымі растлумачыць, чаму ўкраінскія ўлады не хочуць супрацоўнічаць з Ціханоўскай.
— Антываеннай актыўнасці было больш чым дастаткова, — заявіў ён, нагадаўшы, што пазіцыя Ціханоўскай наконт расійскага ўварвання была агучаная яшчэ 24 лютага 2022-га, у першы дзень вайны, і была «абсалютна адназначная».
— Часам здаецца, што афіцыйны Кіеў свядома не хоча заўважаць тое, што сапраўды робіцца не толькі Ціханоўскай і дэмакратычнымі сіламі, але і ўсім беларускім народам, а робіцца вельмі многае, — сказаў Кавалеўскі.
Ён прывёў у прыклад антываенныя пратэсты ў Беларусі ў першыя дні пасля ўварвання, «рэйкавых партызан», валанцёраў і добраахвотнікаў, якія ваююць ва Украіне, гуманітарную дапамогу, данаты ад беларусаў па ўсім свеце, інфармацыйную падтрымку і «тое, што Ціханоўская робіць на палітычным узроўні».
У цэлым, на думку Кавалеўскага, не толькі дэмсілы, але і беларусы наогул «робяць [для падтрымкі Украіны] не менш, а можа, у некаторых выпадках і значна больш, чым іншыя краіны», асабліва ўлічваючы адсутнасць у іх дзяржаўнага рэсурсу.
Аднак Кіеў «часцяком імкнецца гэтага не заўважаць» — каб растлумачыць нежаданне ісці на кантакт з Ціханоўскай і, імаверна, не дапусціць пашырэння канфлікту з тэрыторыі Беларусі, выказаў здагадку прадстаўнік АПК.
— Для нас такая пазіцыя выглядае даволі блізарукай, бо разам мы маглі б рабіць значна больш, — заявіў Кавалеўскі.
Ён выказаў меркаванне, што, аб’яднаўшы намаганні, афіцыйны Кіеў і беларускія дэмсілы маглі б лепш паўплываць на сітуацыю ў Беларусі, «без якой гэтай вайны наогул бы не было».
Пра сумесную Раду бяспекі Пазняка і каліноўцаў: «Пакуль не ведаем, што гэта такое»
Валерый Кавалеўскі таксама пракаментаваў заяву беларускага палітыка Зянона Пазняка пра планы стварыць Раду бяспекі сумесна з палком Каліноўскага.
Паводле Пазняка, новы орган хочуць стварыць «з мэтай абароны нацыянальных інтарэсаў Беларусі», а ў перспектыве ён «можа адыграць вялікую ролю ў адраджэнні Беларусі і ў заваёве свабоды Беларусі».
Чым будзе займацца Рада бяспекі, невядома, аднак намеснік камандзіра палка Каліноўскага Вадзім Кабанчук адзначыў, што ён пакуль «будзе несці больш прадстаўнічыя функцыі».
Кавалеўскі запэўніў, што ў АПК не лічаць новы суб’ект палітычным канкурэнтам і гатовыя да дыялогу з ім, аднак «пакуль не ведаюць, што гэта такое: якія іх мэты, задачы, фарматы іх працы, дзе іх аўдыторыя».
— Калі нам будзе гэта ясней, мы будзем радыя абмеркаваць, якім чынам мы можам узаемадзейнічаць, — патлумачыў палітык.
— Тое, што яны (полк Каліноўскага. — Заўв. рэд.) выбралі палітычны шлях, — гэта, вядома, своеасабліва для вайсковай адзінкі, але мы гэта аспрэчваць не збіраемся, — дадаў ён, выказаўшы жаданне «супрацоўнічаць і шукаць нейкія агульныя падыходы».
Што да непасрэдных кантактаў дэмсіл з прадстаўнікамі палка Каліноўскага, у прыватнасці наконт паставак туды зброі і тэхнікі, Кавалеўскі заявіў, што супрацоўніцтва з імі «не можа абмяжоўвацца выключна пастаўкамі ўзбраення і гуманітарнай дапамогі» і мусіць ісці значна далей.
— Мы зрабілі ўжо досыць шмат, нягледзячы на свае абмежаваныя магчымасці, — заявіў прадстаўнік АПК, гаворачы пра пастаўкі гуманітарнай дапамогі для каліноўцаў.
Пра праект «новага пашпарта» беларуса: «Пытанне гэтага года»
Валерый Кавалеўскі крыху падрабязней расказаў пра анансаваны нядаўна праект «новага пашпарта» для беларусаў — нагадаем, паводле задумы дэмсіл, ён будзе выкарыстоўвацца не толькі для пацверджання беларускага грамадзянства, але і для паездак.
Паводле словаў прадстаўніка Кабінета, дакумент ужо распрацаваны па стандартах Міжнароднай арганізацыі грамадзянскай авіяцыі (ICAO), цяпер вядуцца перамовы з краінамі Шэнгенскай зоны «для таго, каб дамагчыся злучнага звяна паміж самім дакументам і яго прызнаннем у ЕС як праязнога дакумента».
— Як толькі ў нас будзе гэты прэцэдэнт, мы зможам працаваць з іншымі краінамі на двухбаковай аснове, каб дамагацца яго прызнання, — заявіў Кавалеўскі: паводле яго словаў, гаворка можа ісці пра ЗША, Вялікабрытанію, Канаду і іншыя дзяржавы.
На пытанне пра тое, калі можа запрацаваць новы праект, прадстаўнік АПК адказаў, што «гэта непрадказальна, але мы вельмі стараемся». Зрэшты, ён сказаў, што «гэта пытанне гэтага года»:
— Гэта рэалістычна: мы ўжо гатовыя з пункту гледжання тэхнічнага і арганізацыйнага.
Кавалеўскі паведаміў, што атрымаць новы пашпарт зможа любы грамадзянін Беларусі ўнутры краіны і за яе межамі — у выпадку страты або заканчэння тэрміну дзейнага дакумента, калі скончыліся пустыя старонкі і нават «проста так».