16-гадовага падлетка судзілі ў Вялікабрытаніі за тое, што ён выбег на поле ў фінале Лігі чэмпіёнаў, які адбыўся 1 чэрвеня, паведамляе BBC.
Падлетак асуджаны на шэсць месяцаў зняволення ўмоўна. Акрамя таго, яго абавязалі кампенсаваць судовыя выдаткі. Імя фігуранта справы не выдаецца.
Падчас следства падлетак прызнаўся, што выбег на поле ў рамках розыгрышу 300 тысяч фунтаў (прыкладна 387 тысяч даляраў паводле цяперашняга курсу) ад беларускага трэш-стрымера Андрэя Бурыма, вядомага пад псеўданімам Mellstroy. Прадстаўніца абвінавачанага заявіла, што правапарушэнне было ўчыненае ў выніку падбухторвання для «прасоўвання асабістага брэнда».
«Я проста вырашыў так пажартаваць. Мне вельмі шкада, і я шкадую пра гэта», — сказаў падлетак у судзе.
Нагадаем, беларус Андрэй Бурым, вядомы як трэш-стрымер Mellstroy, абяцаў заплаціць 30 млн расійскіх рублёў таму, хто выбежыць на поле падчас фіналу Лігі чэмпіёнаў у майцы з ягоным лагатыпам. Тры фанаты выканалі чэлендж. Гэта здарылася ў самым пачатку гульні паміж мадрыдскім «Рэалам» і дортмундскай «Барусіяй». Матч перарываўся на пару хвілін.
Другі абвінавачаны па гэтай справе паўстане перад судом 27 жніўня. Трэцяму парушальніку забаранілі наведваць футбольныя матчы цягам трох гадоў.