Аляксандр Лукашэнка 8 ліпеня падпісаў закон, які абавязвае беларусаў інфармаваць «кампетэнтныя органы» пра рэгістрацыю актаў грамадзянскага стану адносна сябе і сваіх няпоўнагадовых дзяцей у замежных дзяржавах. Пра гэта паведаміла прэс-служба палітыка.
Дакумент уносіць змены ў законы што да пытанняў рэгулявання шлюбных і сямейных адносін.
У прыватнасці, уводзіцца патрабаванне «інфармавання грамадзянамі Рэспублікі Беларусь кампетэнтных органаў сваёй дзяржавы пра рэгістрацыю актаў грамадзянскага стану адносна сябе і сваіх няпоўнагадовых дзяцей у замежных дзяржавах».
Як гаворыцца ў Грамадзянскім кодэксе Беларусі, рэгістрацыі падлягаюць наступныя акты грамадзянскага стану: нараджэнне, заключэнне шлюбу, устанаўленне мацярынства і (або) бацькоўства, усынаўленне (удачарэнне), смерць, змена прозвішча, уласнага імені, імені па бацьку, скасаванне шлюбу ў выпадках, прадугледжаных заканадаўствам пра шлюб і сям’ю.
Акрамя таго, закон прадугледжвае «замацаванне паўнамоцтваў дзяржаўных органаў па забяспечанні кантролю за выкананнем мер дзяржаўнай абароны дзяцей».
«Устанаўліваецца выразны механізм адбірання дзіцяці на рашэнне камісіі па справах няпоўнагадовых, а таксама адзіныя патрабаванні да зместу і афармлення такіх рашэнняў. Дакументам даецца магчымасць перадачы жылых памяшканняў (доляў у праве ўласнасці на іх) ва ўласнасць дзіцяці ў кошт выплаты аліментаў падчас заключэння пагаднення бацькамі», — паведамілі ў прэс-службе Лукашэнкі.
Асноўныя палажэнні закона набываюць моц 1 студзеня 2025 года.
Чытайце таксама
